Latest News

၁။ အမရပူရမြို့ပြဖွံ့ဖြိုးရေးစီမံကိန်း ဆောင်ရွက်ခြင်းကြောင့် ရွာများပြောင်းရွှေ့ရမည်ဖြစ်ကြောင်း၊ ရွာရှိ အဆောက်အဦများကို ဖြိုဖျက်လျက်ရှိကြောင်းအစရှိသည့် ခေါင်းစဉ်များဖြင့် ကောလဟာလသတင်းများကို စီမံကိန်းဝန်းကျင်ရှိ ရွာများတွင် နေထိုင်သူများ စိတ်ပူပန်စေရန် လူမှုကွန်ရက်များတွင် ရည်ရွယ်ချက် ရှိရှိဖြင့် ဖြန့်ဝေလျက်ရှိကြောင်း တွေ့ရှိနေရပါသည်။

၂။ အဆိုပါကောလဟာလသတင်းများကြောင့် အမရပူရမြို့ပြဖွံ့ဖြိုးရေးစီမံကိန်းနှင့် ထိစပ်ဧရိယာရှိ ရွာများတွင် နေထိုင်သူများအတွက် စိတ်ပူပန်မှုများဖြစ်ပေါ်စေရေးအတွက် ကျွန်တော်များ အမရပူရမြို့ပြ ဖွံ့ဖြိုးရေး စီမံကိန်းမှ ဤကြေငြာချက်ကိုထုတ်ပြန်ပေးခြင်းဖြစ်ပါသည်။

၃။ အမရပူရမြို့ပြဖွံ့ဖြိုးရေးစီမံကိန်းသည် လွန်ခဲ့သော (၁၀)နှစ်တာကာလ (၂၀၁၆ခုနှစ်) ကပင် စတင် ဆောင်ရွက်ခဲ့သော စီမံကိန်းဖြစ်ပါသည်။ စီမံကိန်းဧရိယာအတွင်း ရှမ်းကလေးကျွန်းရွာ တစ်ရွာသာပါဝင်ပြီး အခြားမည်သည့်ရွာမှပါဝင်ခြင်းမရှိကြောင်းနှင့် ရှမ်းကလေးကျွန်းရွာသည် စီမံကိန်းဧရိယာတွင် ပါဝင် သော်လည်း ရွှေ့ပြောင်းရခြင်းမရှိသည့်အပြင် ရှမ်းကလေးကျွန်းရွာ ဝန်းကျင်တွင် ရွာပတ်လမ်းမကြီးများ၊ လျှပ်စစ်မီးတိုင်များ၊ သစ်ပင်ပန်းပင်များ၊ ကျောင်းများ၊ ဆေးပေးခန်းများ၊ မီးသတ်စခန်းများ အစရှိသော လူအများနေထိုင်ရာတွင် လိုအပ်သည့် အများနှင် သက်ဆိုင်သော အဆောက်အဦများကို ကုမ္ပဏီ ကုန်ကျ စရိတ်ဖြင့် ဆောက်လုပ်ပြီးရွာနှင့် ရွာဝန်းကျင်ကို အဆင့်မြှင့်တင်ဆောင်ရွက်ပေးလျက်ရှိပါသည်။ ယခုအခါ တွင် ရှမ်းကလေးကျွန်းရွာသည် ယခင်ကာလထက်များစွာပို၍ ဖွံ့ဖြိုးတိုးတက်ပြီး ကောင်းမွန်လာသည်ကို လက်တွေ့မြင်တွေ့နိုင်ပါသည်။

၄။ စီမံကိန်းဧရိယာတွင်ပါဝင်သောမည်သည့်မြေနေရာကိုမျှကုမ္ပဏီကအခမဲ့သိမ်းယူဆောင်ရွက်ခြင်း မရှိကြောင်း၊ ကုမ္ပဏီအနေနှင့် စီမံကိန်းဧရိယာတွင်ပါဝင်သောမြေနေရာများကို သက်ဆိုင်သူများထံမှ ကာလ ပေါက်ဈေးများဖြင့်ညှိနှိုင်းဝယ်ယူခြင်း၊ရောင်းချလိုခြင်းမရှိသောမြေနေရာများကိုစီမံကိန်းစာချုပ်ပါအတိုင်း မြို့မြေကွက်များဖြင့် ပြန်လည်လဲလှယ်ပေးခြင်းနည်းလမ်းများဖြင့်သာ ဆောင်ရွက်ခဲ့ပါသည်။

၅။ စီမံကိန်းဧရိယာတွင်ပါဝင်သောမြေနေရာများ နှင့် သက်ဆိုင်သူများအနေနှင့် မိမိနှင့် သက်ဆိုင်သော မြေနေရာများ အတွက်တန်ဖိုးငွေရယူခြင်း (သို့မဟုတ်) မြို့မြေကွက်များဖြင့် လာရောက်လဲလှယ်ခြင်း နည်းလမ်းများဖြင့် ဆောင်ရွက်ရန် အမရပူရမြို့ပြဖွံ့ဖြိုးရေးစီမံကိန်း အထောက်အကူပြုကော်မတီမှ ပထမအကြိမ်အသိပေးကြေညာချက်အား (၁၅.၉.၂၀၂၃)ရက်နေ့၊ ဒုတိယအကြိမ် အသိပေးကြေညာချက်အား (၁၈.၁.၂၀၂၄)ရက်နေ့၊ တတိယအကြိမ် အသိပေး ကြေညာချက်အား (၁၃.၁၁.၂၀၂၄)ရက်နေ့၊ စတုတ္ထအကြိမ် အသိပေးကြေညာချက်အား (၁၆.၃.၂၀၂၅) ၊ (၁၈.၃.၂၀၂၅) နှင့် (၂၀.၃.၂၀၂၅)ရက်နေ့များ၊ ပဉ္စမအကြိမ် အသိပေးကြေညာချက်အား (၇.၄.၂၀၂၆) ၊ (၈.၄.၂၀၂၆) နှင့် (၉.၄.၂၀၂၆) ရက်နေ့များတွင် သတင်းစာ များတွင် ထည့်သွင်း၍ လည်းကောင်း၊ သက်ဆိုင်ရာ ရပ်ကွက် အုပ်ချုပ်ရေးမှူး ရုံးများတွင် ကြော်ငြာဘုတ်များ စိုက်ထူ အသိပေးခြင်းဖြင့် လည်းကောင်း အများသိစေရန် ပွင့်လင်းမြင်သာစွာ ကြေညာပေးခဲ့ပါသည်။

၆။ အဆိုပါကြေညာချက်များ အကြိမ်ကြိမ်ဆောင်ရွက်ပြီးသည့်တိုင်အောင် လာရောက် ဆက်သွယ်ခြင်း မရှိသေးသောသူများအနေနှင့် အဆိုပါမြေနေရာများနှင့် သက်ဆိုင်သည့် စာရွက်စာတမ်း အထောက် အထားများပြည့်စုံစွာဖြင့် အမရပူရမြို့ပြဖွံ့ဖြိုးရေးစီမံကိန်း အထောက်အကူပြုကော်မတီသို့ သော်လည်း ကောင်း၊ ကျွန်တော်များကုမ္ပဏီသို့သော် လည်းကောင်း လာရောက်ဆက်သွယ်ပါက သတ်မှတ်မြို့မြေကွက် (သို့မဟုတ်) သတ်မှတ်တန်ဖိုးငွေများ ပြန်လည်ထုတ်ယူရရှိရေး အတွက်ကိုလည်း စီစဉ်ဆောင်ရွက်ထား ရှိပါသည်။

၇။ စီမံကိန်းဧရိယာအတွင်းမြေနေရာအချို့ကို လူပုဂ္ဂိုလ်အဖွဲ့အချို့မှ တရားမဝင် အကွက်ရိုက် ရောင်းချ ခြင်းကြောင့် ဖြစ်ပေါ်နေသောအခက်အခဲများနှင့် စပ်လျဉ်း၍လည်း အများသိစေရန် ဆက်လက်ရှင်းလင်း တင်ပြအပ်ပါသည်။

၈။ စီမံကိန်းဧရိယာအတွင်းရှိ တရားမဝင်အကွက်ရိုက်ရောင်းချထားသော မြေကွက်များအပေါ် ဆောက်လုပ်ထားသော အဆောက်အဦများနှင့်စပ်လျဉ်း၍ အများသိစေရန် ဆက်လက် ရှင်းလင်းတင်ပြခြင်း။

၉။ သို့ဖြစ်ပါ၍ အမရပူရမြို့ပြဖွံ့ဖြိုးရေးစီမံကိန်းကြောင့် မည်သည့်ရွာမျှပြောင်းရွှေ့ခြင်း မရှိကြောင်း နှင့် စီမံကိန်းဧရိယာအတွင်းရှိတရားမဝင် အကွက်ရိုက်ရောင်းချထားသူများထံမှ အမှန်တကယ် ဝယ်ယူမိ သူများဖြစ်ပါက ဆုံးရှုံးမှုများသက်သာစေရေးအတွက် ကုမ္ပဏီအနေဖြင့် တတ်နိုင်သမျှအကောင်းဆုံး ကူညီ ဆောင်ရွက်ပေးမည်ဖြစ်ပါကြောင်း အများသိရှိစေရန် လေးစားစွာဖြင့် အသိပေးကြေညာအပ်ပါသည်။